جدتي الله يرحمها انسانة كانت مرة مهتمة ببشرتها الين ماتوفت الله يرحمها ويغفر لها , انا وحده لما كنت أشوفها اقول راح اصير زيها , تخيلو يابنات الين ماتوفت وهيا شباب وبشرة وجهها تجنن زي الأطفال.
استنو جايتكم بالطريق بالهرجه ايش هيا الوصفه صبركم بالله , انا كنت ملاحظه عليها تشتري كميات كبيرة من موية الورد الطايفي واقول بيني وبين نفسي ايش حكايتها دي القوارير ولما اروح بيتها اشم ريحة بيتها معطر بموية الورد الي تفتح النفس وموية الكادي الي تحطها بموية الشرب وتنشرب باارده الله يرحمها .
نجي للوصفة ~
الوصفة عبارة عن موية ورد ونشا بس ..النشا الأبيض الي ينباع بالسوبرماكت الي يسوو منه مهلبيه المهم كانت تجيب علبة جديدة موية ورد وتحط فيها ملعقة أكل نشا وترج القارورة رج الين تصير بيضاء وتحط منه بقطنه على بشرتها قبل النوم وأول ماتصحى وقبل ماتحط الميك أب , شفتو كيف جداتنا وصفاتهم بسيطة بس مفعولها يدوم لآخر العمر بس, وكانت تحط القارورة فوق التسريحة عشان ماتنسا وتفضل فاكرتها . المهم يابنات جد الوصفة أنا جربتها ومازلت مجربتها احساس منعش وتجديد للبشرة انصحكم تجربوها وعلى فكرة مو بس دي الوصفه الي كانت عندها للعناية ببشرتها كمان عندها كنز من الوصفات راح أهرج عنها المرات الجية باذن الله ,واتمنى تدعولي اول ماتجربوها .
دمتم بحب .
ليست هناك تعليقات:
إرسال تعليق